Mabanglo, Tila Ako si Bidasari

November 11th, 2007

Tila Ako si Bidasari
Ruth Elynia S. Mabanglo

Tila ako si Bidasari–
Patay sa araw, buhay sa gabi:
Naghihintay kay Sultan Mogindra
Na sa buhay ko’y ikaw;
Naghihintay ng maalamat na halik
Na isiil mo sa dagat na dibdib
Upang ibangon ako
Sa masasamyong panaginip.

Laon,
Laon na,
Laon na ngang ako’y naghihintay
Sa mga hubad na paang iyong idadantay
Upang muli’t muli’y iyong mapasiklot
Ang kilii kong natutulog
Sa balakang at batok,

Ay, dilim lamang ang aking kaibigan,
Ang karagatang lalanguyan
Ng gintong isda ng aking pagnanasa
Kaya’t doon
Doon mo iamba
Ang salakab ng dudupil
Sa malay ko’y pagkamulat.
Lambat mo’y ihagis,
Ihain ang bitag,
Lamayin ako sa iyong magdamag.

Entry Filed under: echoes